Од љубов никогаш не ти е доста.
Крвта постојано бара нова крв,
телото постојано бара ново тело.
Никој не е достоен за твојата жед,
никој не е доволен за твојот копнеж.
Ти си ненаситна!
Насекаде си ,барајќи ја насладата,
ја впиваш секоја капка пот
и секоја воздишка предизвикана
од твоите бедра
и твојот танц во ноќта.
Ти си ненаситна!
Не се најде маж кој ги има сите твои желби
во својата рака, во својот допир.
Не се најде јунак,
јунак кој ќе го освои твоето царство
на солзи , смеа и крв.
Ти си ненаситна!
И секоја игра е се пострашна,
секоја потрага предизвикува бол,
секоја рана станува се подлабока,
јазикот на секоја жртва
истружен лечејќи ги твоите рани.
Ти си ненаситна!
Но само така се чувствуваш дека те има,
дека си доволно жива
за да танцуваш со ноќта,
за да не умираш полека
без никого покрај себе.
Comentários:
Post a Comment